買樓係重要決定，牽涉巨大嘅資金同長期嘅供款。喺不同嘅年代背景，對不同嘅人，是好是壞，未可一概而論。福德厚嘅，今日播下嘅種，成為日後嘅好果；福德薄嘅，今日認為係好嘅決定，可能成為日後嘅負累。
我同人算命只話畀來人知佢人生前路嘅興衰旺敗同埋高低起落，只起一種啟發性嘅作用。無論命理預示係點，人生前路，最後都要用智慧，勇氣同毅力去完成。
無論你話人生苦短或者長路漫漫都好，如果你可以睇到自己未來嘅起伏狀況，無論係真係假，你做一個重大決定之前，點都要盡量掌握多啲資料同預計未來嘅變化。
孫子兵法有話：「故善戰者之勝也，無智名，無勇功，故其戰勝不忒，不忒者，其所措必勝，勝已敗者也。故善戰者立於不敗之地，而不失敵之敗也，是故勝兵先勝而後求戰，敗兵先戰而後求勝。」
其實講到尾，孫Sir都係叫人唔好隨便就出兵打仗，「無智名，無勇功」，想打贏，唔駛係天縱英才，總之做多啲事前準備功夫，睇遠啲，識驚，計到贏面夠大先至好出擊總係冇錯嘅。
但係幾時做買賣？長短線嘅結果如何？將來好成點，或者壞成點？自己能否承受？除咗係一種責任性之外，仲希望來人明白，自己嘅前途始終都係要決定喺自己嘅手裏面嘅。成功失敗，往往取決於一念之間，可能歸因運籌帷幄，計算精準，又或者不過係靠一膽二力加少少功夫。而得到幾多，失去幾多，虛實之間，未到最後，又往往好難計算。
喺命理嚟講，影響人生嘅大吉凶，一定會顯示喺命盤上面，而一般做樓宇按揭買賣嘅「人生大事」，命理可以顯示為好事亦可以係壞事。因為你當時始終係「損失」咗一大筆錢用嚟做down payment，仲開始失去咗好多嘅機會成本，分分鐘捆綁你一生，不過同時你亦擁有「自己」嘅居所，感覺應該都係好嘅。而喺命盤幾時會顯示出係好或者係壞，會傾向於邊一便多啲，命理對人生嘅價值點樣取捨，我覺得永遠都係難以勘破嘅天機。
